توجيهات وتوعية

مابين الواقع والحقيقة

- بعد التحول للتعليم الإلكتروني وتأجيل امتحانات نصف السنة إلى إشعار آخر ، راح انطيكم مجموعة نصائح عسى ولعله تفيدكم ان شاء الله ، وحتكون على شكل سؤال وجواب.

1⃣ هل ابقى ادرس لامتحان نصف السنة لو اتقدم بالمادة اذا صار عندي مجال ووقت ؟

- اذا خلصت المادة المطلوبة منك بنصف السنة ، فإني افضل انك تتقدم بالمادة وتمشي بيها ، بعدين من يحددون موعد امتحان نصف السنة تكدر تراجع مواد امتحان نصف السنة  ، وبهاي الطريقة انت تكون استفاديت ، أنه مشيت مادة فوك مادة نصف السنة + بكل الاحوال من تمتحن حتراجع مادة نصف السنة مو تمام ؟ بس اذا ماعندك وقت تمشي بالمادة ومو دارس نصف السنة زين  فالافضل تضبط امورك يلا تعبر تمشي ، تمام ؟

2⃣ شكد تتأجل امتحانات نصف السنة ؟ 

- ك رأي شخصي اقل شي أسبوعين فما فوق والله اعلم ، لكن انت لا بس تفكر ب امتحان نصف السنة ، انت فكر أنك طالب وزاري وهمك الأكبر هو الامتحان النهائي واضح ؟ فتدرس للوزاري بالدرجة الأولى ، أما نصف السنة فمثل ما ذكرت اول نقطة.

3⃣ هل راح تكون امتحانات نصف السنة حضورية لو إلكترونية ؟

- طبعاً 1٪ أنه تكون إلكترونية ( يعني استبعد الالكتروني بشكل كبير ) ف 99٪  هي حضورية ، وحتلو إلكترونية انت شعليك ؟ ترى امتحان نصف السنة يفيدك ب أنه تدخل وزاري ويفيدك ب أنه تراجع المادة الي درستها ب  اول نصف من السنة !؟ فإذا حضوري او إلكتروني فأنت اذا تدرس لنفسك واذا لا هم لنفسك لأنه بالنهاية منتظرك امتحان وزاري بالقاعات لو يصير غزو فضائي هم , خوش ؟ فإذا درست تفيد نفسك بذاك اليوم واذا لا ف انت انتحرت بنفسك بغض النظر أن كان إلكتروني او حضوري يا عزيزي.

4⃣ هم حيكون اكو تقليص بعد لو هذا هو التقليص ثبت مثل ماهو ؟

- انت ابدددددد لا تفكر أنه اكو بعد تقليص ولا تخلي هيج فكرة ببالك ابدددددد ، انت ظل ادرس المادة مثل ما مقلصة هسه ولا تتأمل ابد شي من الوزارة ، وأساسا يضركم التقليص مايفيدكم ، لهذا ادرس مثل ماموجود هسه وعود اذا اذا اذا اذا اذا صار تقليص ( ولو استبعد هلشي) ف انت اصلا مسيطر لأنه فقط حتقل عليك المادة بالزايد وانت ببر الأمان ، لهذا افضل تدرس وما تخلي ببالك أي فكرة تقليص آخر.

5⃣ شلون حنتعامل مع التعليم الإلكتروني ؟ وهل اكو رجوع للداوم الحضوري ؟

- انت كطالب لو تستغل موضوع التعليم الإلكتروني كلش حتستفيد فوك ما تتوقع والله ، ولا تعتمد غير على نفسك ، ترى جديات كلشي متوفرلك من أساتذة يوتيوب ، ملفات ملازم وزاريات توضيحات توجهيات ( بتاعي😂) وامتحانات شهرية بالبوت و كلشي وكلاشي تخليك تهكر السادس وانت بغرفتك !! ف اعرف استغل الوضع ووقتك وفطحل بالمواد جديات فرصة هاي لا تفلتها من ايدك خوش ؟ ف اعتمد على نفسك واكعد ادرس وامشي ترى محد يفيدك بعدين.

اما سالفة الرجوع للحضوري فصعبة واذا رجعنا ف ماراح يخلونك تداوم اسبوع او 10 ايام مثل ماصار كورس اول كلاوات ، وتنتهي ف مايفيد صراحة ف اكعد وادرس واستر على نفسك ترى تتندم.

6⃣  سالم انت ايمت تتوقع يكون الامتحان الوزاري ؟

- حسب توقعي الشخصي أنه حيكون بشهر الثامن وتحديدًا مابعد منتصف الشهر الثامن لعدة اسباب اهمها :-

- تأجيل موعد امتحانات نصف السنة وهلشي يجبر الوزارة أيضا تزحف الامتحان الوزاري.

- موعد امتحانات طلاب الجامعة إلي حيصادف شهر (25_ 7) وهذا أيضا سبب يخلي الوزارة تدفع الامتحانات لحد مايخلصون الجامعة امتحاناتهم لأنه طلاب السادس يمتحنون بالجامعات.

- وعيد الأضحى المبارك هم حيصادف شهر السابع (20_7) فهذا هم سبب يدفعهم لتأجيل الامتحانات.

- أيضا تعليم إلكتروني او ربما رجوع المدمج ( استبعد) الي تخلص السنة والطالب ممداوم اسبوع بي.

- كثرة العطل بعد شهر الثالث.

كلها أمور ترجح تأجيل الامتحانات للشهر الثامن.

✍ :- سالم ال منصور

شبكة نيوتن التعليمية