طريقة الحصول على اكثر من 90 درجة بالامتحان الوزاري مادة اللغة العربية صف سادس اعدادي

تقسيم درجات العربي

شوف التقسيم الوزاري لدرجات العربي حتى يعرف دماغك وزن درجات القواعد والادب والانشاء في الوزاري .

الاستفهام (12 درجة)

النفي (15 درجة)

الاستثناء (10 درجة)

التقديم والتاخير (13 درجة)

 تقسيم الدرجات يختلف من سنه الى اخرى اختلاف بسيط ،مرات دور يجي ع الاستفهام7 ومرات 8 ومرات 9، يعني مو ثابت ولهذا كتبتلك من ألى.

 الشعراء والقصائد (12-8درجه)

 المدارس الشعرية (6د)

 النثر وفنونه(18د)

 الابيات الشعريةالمتفرقه(4د)

 أسئلة عامة(8-6د)

الانشاء(20درجة)

اول خطوة تسويها واهم خطوة تحضر{ملزمةقواعد-ملزمةادب} مضبوطه سواء ملزمة مدرسك الخصوصي او مدرس ثاني تعرف انو ملزمته مضبوطة وملزمه حلول اسئله وزاريه 

هسه شتحضر : تحضر ملزمه مضبوطه+للقواعد ملزمه حلول اسئله وزاريه من 1990الى2018دور ثالث وللادب حلول اسئله وزاريه من 2005الى2018دور ثالث .

من تقره بالملزمه مالتك سواء اي موضوع كان (سواءالقواعد اوالادب) وبس تخلص من الموضوع مهم جدا جدا جدا تحل اسئلتة الوزارية شلع قلع ،إتجيب ورقه وقلم تتخيل نفسك كانو انته گاعد بالقاعه الامتحانيه تمتحن نفسك وتحل بهدووء وبتركيز.

اسئلة العربي لا تحتوي على ترك سؤال ابدا تحتوي فقط ترك ضمني يعني سؤال بي ثلاث فروع او اكثر تترك فرع منة سواء في القواعد او الادب .

 تبدأ تجاوب اسئلة الادب ثم القواعد ومن ثم الانشاء 

هسه بيمن تبدي؟ (ادب،قواعد،انشاء)

 يا اخي اهم شي تحفظ السؤال وتفهمه قبل الجواب لان القواعد اسئلتها لغوية 

مثلاً عدنا انواع الاستفهام حقيقي ومجازي 

اذا اجاك س/مانوع الاستفهام ؟ انت ماطولك ماحافظ السؤال اكيد راح تجاوب لو حقيقي لو مجازي وهو خطا فادح ،هذا السؤال للاستفهام التصديق او للتصور وتجاوب عنه لو استفهام تصديق لو تصور حسب الجملة،،، عندك 

س/ الى اي غرض خرج اسلوب الاستفهام؟ هذا السؤال خاص (للاستفهام المجازي) انته ماطول حفظت السؤال فراح تجاوب لو لغرض النفي لو لغرض التعجب ،لذلك احفظ وافهم السؤال بالقواعد وبعدين الجواب ،

 اول ماتقره القاعدة وتفهمها وتحل امثلتها وتمارينها الي بالكتاب مثل ماكتلك حل كل الاسئله الوزاريه راح تلكه كم سؤال تتلكئ بي شتسوي تجيب قلم مال شطب وتشطبه حته بالمراجعة وبليلة الامتحان تتذكر هذا السؤال

 

احفظ هاي الاسئلة واعرف شلون تجاوبه 100%تجي:

س/اعرب اسم الاستفهام ؟

س/مانوع الاستفهام؟(اما تصديق او تصور)

س/كيف تجعل الاستفهام من النوع الاخر؟

س/الى اي معنى خرج الاستفهام؟(لغرض النفي او التعجب)

س/استبدل اسم الاستفهام باسم اخر بمعناه؟

س/ما خصيصة اداة الاستفهام؟ 'هل والهمزة'و هل يمكن استبدال هل بالهمزه؟ او بالعكس 

هكذا بقية الاساليب لازم تقراها بهاي الطريقة وراح تتقنها من تحل الاسئله الوزارية وراح تعرف نمطها وكيف يفكر ابو الوزاري وشنو الاهم وشنو المهم .

عزيزي من الأخير اتقن (أفكار) تمرينات الكتاب أي ادرس التمرينات ثم الوزاريات لأنها تعطيك فكرة شاملة وعامة حول الموضوع. 

سر القواعد:فهم وحفظ السؤال هو كل الجواب.(افهم واحفظ القاعدة مع كيفية مجيئ السؤال وكيفية الاجابة عليه ثم طبقها على تمارين الكتاب اولا والوزاريات شلع قلع ثانيا.)

 

س/القواعد يجي خارجي لو يجي من الكتاب ؟؟ 

-ابيات الوزاري جداا واضحة ومكررة وزاريا من الاعوام السابقة ومن افكار تمارين الكتاب ماكو اي خارجي في القواعد، لذلك اقره وزاري من ١٩٩٠ لحد اخر دور وزاري بهيج يروح كل تعقيد القواعد .وتضمن درجته 100%.

اذا ضبطت اسئلة المناقشة ووالاسئله الوزارية مال الادب من 2005الى حد 2018دور ثالث تجيب (35_40درجة)بدون اي شك وبنسبة 100%،وانته من تقره الاسئله الوزاريه راح تشوف السؤال شكم مرة مكرر .

الغالبية من الطلاب بس يحفظ ادب وهذا جدا خطأ تره تنسه وهذا سبب نسيانك!!! انته احفظ وبعدها ثبت الحفظ عن طريق المراجعة اكثر من مره ومرتين وثلاث وضروري جدا تحل الاسئلة الوزاريه ورقه وقلم حته المكرره ارجع حلها مره ثانيه لحد ماتثبت المادة الي حفظتها بدماغك، ويصير نسيانه قليل كلش بمجرد بس تجي غير مره تقره الموضوع مره ثانيه راح تتذكره كلش زين.

 

تابع فيديو على اليوتيوب للاستاذ حمزة الجابري كلش راح يفيدك عن كيفية الاجابة عن الانشاء . هذا الفيديو 

بالوزاري ينطوك ٢٠/٢٠ عله الانشاء اذا حصلت درجة ٤٠/٤٠ في القواعد والادب.

ماطولك وصلت لهنا بقراءة كلامي احفظ الموضوع  اللي گولته الك ومن تقره بالمراجعة اقرة البوست مرة ثانية وبحيل الله تضمن ال99

(( بالتوفيق للجميع يارب ))