أفضل جدول دراسي في رمضان: تنظيم الوقت بين الفطور والسحور مع نظام صحي متوازن

هواي بيكم يكول رمضان شهر صعب على الطالب وراح يخسر هواي وقت وما يكدر يتقدم بالمواد وانتاجيته تقل ومن هل حجي ... وتحب تصدك او ما تصدك بكيفك ... ترى رمضان بي انتاجية اكثر من الاشهر العادية وهذا الشي مثبت علمياً وعن تجربة شخصية وهواي غيري هم كالوا نفس الشي ... وشهر مبارك جداً بحيث تشوف عندك الواهس والحيل والطاقة رغم الجوع والعطش اثناء اليوم ... ولو تعرف فوائد الصيام على جسمك بدراسات علمية جان خليت حياتك كلها صيام . هسة راح تكلي لعد ليش اني اشوفه صعب اكثر من بقية الاشهر ؟ مو هو صعب وانما احنا دنخلي صعب .... الموضوع يرادله تنظيم للوقت وتفهم عقلك شنو يحتاج حتى تكدر تدرس وشنو لازم تاكل حتى ما يأثر عليك بالصيام.

الفطور : بوقت الفطور معدتك تكون فارغة تماماً فلا تجي كبل تاكل اكل دسم هذا راح يسوي بيك عسر هضم ... وتكدر تبلش بتمر او لبن او عصير (بس لازم ما يكون ليمون او حامض بشكل مركز لان هيج راح يدمرها المعدة)

لا تاكل للتخمة : من اكثر الاخطاء الشائعة الي يسووها الناس هو التخمة بوجبة الفطور بحجة صايم ولازم اشبع وجوعان ومن هل حجي ... وهذا خطأ كارثي للطلاب لان راح يدمر تركيزك بعد الفطور

ترى اذا تاكل زايد وداعتك هاي كاعد تسد نفسيتك وشهوتك للاكل مو معدتك واذا تريد جرب يوم واحد وشوف نفسك ... اكعد اتخمها بالاكل ووصل كرشك لخشمك وتصير معدتك جيس حصة وشوف بعدها راح تكدر تدرس لو لا ... هسة يكول اي اكدر ... صحيح لكن بعد ساعتين اقل شي يلا يرجع تركيزك الطبيعي وهنا انت كطالب وخاصة لذولة الي عندهم تراكمات او يادوب يلحك فهنا الساعة تفيده

من تبدي تفطر : حتى تاكل بشكل صحي وما يأثر على عقلك وتكدر تدرس فلازم مبدئياً اول شي تخلي بمعدتك هو : تمر او لبن او عصير او اذا تريد بس مي عادي جداً ... وهنا من تجي تشرب السوائل فلا تشرب دبة وتفجر بطنك جنك حوت لان هيج ما راح تشتهي الاكل وانما على كد تسد عطشك ... وبعدها فوت 5 دقائق وابدي اكل وبالعافية مقدماً

ومن تبدي تاكل مثل ما كتلك لا تتخم بالاكل وصدكني اذا تسوي هذا الشي ما راح تحتاج تضيع وقت هواي حتى يرجع تركيزك مثل ما يكولون البقية فوت كم ساعة بعد الفطور يلا تدرس وانما هنا راح تكدر بحد اقصى ساعة او اقل وتشوف معدتك سادة جوعك وبنفس الوقت عقلك ما مجيم وضاربة دهن حر للسقف ... هذه النقطة مهمة جدا انتبه الها حتى لا تصير مثل دعبول ابو نتلة

لا تنام بعد الفطور : ولك دبدوب ديربالك تنام انت وبطانيتك ام البزون (مو نمر) ... ترى النوم بعد الاكل (خصوصاً الدسم) = ثكل ارباع وحيل ينباع ... وراح تشوف يرادلك وقت هواي يلا تصحى ويرجع نشاطك ... واذا جنت مسختجي اصلي تجرها نوم ازلي للوزاري

السحور : وجبة جداً مهمة برمضان ... لان هي الي راح تحدد كمية الوقود الي راح يكون بجسمك حتى يكدر يدرس لساعات اطول او لا وتصمد لحد الفطور

لا تاكل للتخمة : حاله حال الفطور ... مو تروح تاكلي الثلاجة كلها وتطلع تشربلي نهر الفرات ... واحدكم ابو كرش يظن اذا ياكل اكثر يعني راح يصمد اكثر بالجوع والعطش ... ولك انت انسان مو جمل حتى تظن انو عندك مخزون غذائي عملاق

لمن تاكل وجبة السحور تكدر تاكل تمر كلش مفيد وانصح بي كمجرب وعندك اذا تريد شوربة عدس بيها مخزون مائي عالي يساعدك بطرد العطش اثناء صيامك وبنفس الوقت بروتين يسند جوعك لفترة او عندك الخضروات والفواكه ذني بيهن ايضاً مخزون مائي وكذلك الياف وطاقة

تجنب : اكل الاطعمة الي بيها دهن وسكريات لان ذني راح يدمروك بالصيام واحتمال يخرب صيامك وما راح تتحمل لدرجة حتى لو ما تسوي اي جهد او دراسة راح تشوف نفسك تدمر من ناحية العطش.

اوقات الدراسة : لحد يجي يقنعك تعال ادرس بهيج جدول وهذا ما تكدر وهذا افضل ... ترى ذني مو ثوابت تناسب الكل ... وبرأيي افضل جدول هو الجدول الي انت تحدده حسب ظروفك وطاقتك وروتينك وشغلك ووقت نومك ... الخ

شلون اعرف يا وقت انسب الي للدراسة ؟ : اول شي تسوي تجيب ورقة وقلم حتى تسوي جدول بعدها ترتب اشغالك باليوم مثلاً اذا عندك طلعات او ظروف او شغل خاص وهيج راح تكدر تعرف يا وقت انت تكون بي متفرغ وتكدر تدرس وعلى اساسه ترتب جدول

مسائي : بعد الفطور يبلش ويكعد يدرس للسحور وبعدها ينام ويكعد الظهر يكمل لحد ما يصير الفطور

صباحي : ينام بعد الفطور (يفوت كم ساعة يلا ينام) وبعدين يكعد على السحور ويستمر بدراسته لحد الظهر او العصر وينام كم ساعة ويكعد على الفطور